راعي العجرا والجمس ومن يقدر ينزل الاول

لسلام عليكم ورحمة الله وبركاته

سالفة جديده بعنوان

راعي العجرا والجمس ومن يقدر ينزل الاول

هذي سالفه قديمه اعتقد انها عام 1968 بس شوفوا كيف ماني بسيط موثق السالفه بالتاريخ الميلادي

مهوب كله ذهانة بس السياره جمس ونيت موديله 68 جديد فاكينه من ملعب الصبان بجده

وانتم عارفين منول نركب كلنا بالصندوق حريم ووغدين واحيان نركب معنا غنمنا ودجاجنا ويمكن بعد السواق يركب معنا بالصندوق من سعة الصدر وعلى وين على مزرعتنا بالخرج على الخط الاول

اللي عرضه مثل ارتداد الفيلا 180 سم مكعب عرضي طولي وش يعرفني بالهندسه ورسم المحيطات

الموتر اذا جاء مطب مانقول اح ولا اه لو ينكسر عندنا البنكرياس والاثنى عشر وتقطم مسامير الركب

و نتوجع ونسكت من الفرحه

ومع هذا نغني نقول

ياجر قلبي جر صدام لوري - مع رفرف للجمس ماهوب برا

سواقنا لا جاء مطب دق بوري - بوريه اللي مثل خوص يجرا

عاد حنا يالصغيرين نركب عند الباب وكل أم ماسكه ورعها مع ثوبه لايطيح مع المطبات

وحنا متفقين نتسابق نبي نشوف من يحول للمزرعه الاول وقبل مايدخل الموتر للمزرعه نتعلق على الصدام اذا شفتنا تقول قردان بديد خلفه متشعمطين بالباب

واذا وصلنا للمزرعه اول ماندخل نطب من الساره بس نمشي معها شوي حتى نظبط التوازن ثم نفكها وكل يقول انا الاول انا الاول وكلنا نحلف ونقسم ويمكن بعضنا يطلق بالثلاث انه هو الاول

المهم مرة من المرات اخيك راعي العجرا من زود الذهانه وقف بالباب الخلفي على الصدام يبي يصير الاول ومسكت الباب بيديني ووجهي معاكس السياره ابغى انزل بدون ان امشي معها شوي

تقل طالع من باب البيت وانا افك نفسي وانا اقول انا الاول

الا وطيح على وجهي وبطني ولا ادري عقبها بشي انا بارض والا بسماء الموتر خل المزرعه ونزلوا

الحريم والعيال الاول والتالي وطبخوا ويمكن بعد صلحوا فطورهم وانا ممد على الارض بس صحيت بس مقوى اتحرك العيون والخشه (ياخشة قلبي يا هاالخشه) والاذان حتى ضرس العقل طاح قبل مايطلع حتى سري اللي تحت الثوب والفنيله لقيت فيه رمل وشوكه

المهم بديت ازحف على يديني ورجليني ابي امي الله يرحمها ويغفر لها عاد اللي قاهرني زيادة على الاوجاع مريت من عند البركه والعيال يسبحون ويلعبون بالماء

المهم يوم دخلت عند الوالده ووجهي كله اورام وجميع الالوان غادي وجهي تقول مزهريه متحركه

وانا ادخل عليها وماعرفتني ولا معي اثبات هويه

المهم اخذوني وغسلوا وجهي وجميع انوع الدهان من فكس وفازلين وابوفاس حطوه على جسمي

حتى الزيت المحروق حق مكينة البلاكستون نقعوني فيه حتى غديت تقل بس مطبخ اذا مريت من عند احد يسمي بالله والبعض اذا شافني يقول الله يقصرنا ويقاصرهم بالاحسان محد يعرفني

واخيرا انت الرحله وانا على الفراش بحوض نخله

انتهت السالفه وقبل الختام سبحانك اللهم وبحمدك لااله الاانت استغفرك اللهم واتوب اليك

مع تحيات اخيكم راعي العجرا

الرياض = منفوحه حلة ابن نصار دوار ام سليم

via منتديات مكشات http://www.mekshat.com/vb/showthread.php?t=603491&goto=newpost