بنشر حريم على الخط السريع ... بيتر السروات

بنشر حريم على الخط السريع ... بيتر السروات

بسم الله الرحمن الرحيم

يقول احد الإخوان لدينا زميل بالعمل ما شاء الله عليه راعي فزعه و حظه طيب واخبرنا بقصه من قصصه يقول .....

قبل سنوات خوينا على موتره نيسان على طريق سريع مسافر او راجع من موقع عمله البعيد... مر على ذاك الجمس وارد سنته

مبنشر وداخل في الرمل على جانب الخط وتعداه بمسافة بسيطة وشاف حريم وراء تبه صغيره وطقت النخوه معه

يوم شاف الحريم ...

يقول مالي نية أوقف بس يوم شفت الحريم وما حول السيارة

إلا رجال لوحده

يقول ووقف ودق الريوس

ويوم قربت من الرجال وقفت ونزلت وصحت عليه ياااااا ولد...

سلام عليكم .. طلع من جانب الموتر ورد علي إلا انأ في رجال

ما أعيب عليه لكن من رزته وشكله لو سألته وين الاسبير ما عرف وينه

.. ولد نعمه

.....

حتى من زود الذرابه مفسخ الثوب على شان البنشر هههههه

يقول طالعت الموتر الا بنشر والرجال وقفه على رمله وغاص الكفر

طبعا خوينا راعي تغاريز وطعوس يعني سندباد بري

يقول خوينا عرفت ألشغله يبيلها حفر وعفريته ثانيه وتخبرون الجمس ثقيل

بعد النظره الشرعية ... اقصد الفنية .. رحت لموتري ونزلت العدة ودخلت تحت الجمس وشيل وحط وحفر وخوينا راعي الموتر

ما شفت منه فائدة الا انه كل ما نزلت راسي تحت الموتر الا خشته بخشتي

ازعجني... جو حار ... وعرقان.. وهذا لا يحذف ولا يجب حصى كل

ما دخلت تحت الموتر اضبط العفريتة وإلا احفر انسدح جنبي

قلت له ارتاح وإنا اخوك.... انت شكلك تعبت وانأ أبي اصرفه إذاني الله يصلحه ...

ما صدق على الله ولد النعمه جلس في ضل الموتر

بعد ما رفعت الموتر قلت عطني الاسبير قال وينه ....

قلت في نفسي والله إني داري نزلت الاسبير وركبته وطلعت الموتر

من الغراز يمكن ساعه وانا احوفر والحمد لله طلعته

وراعي الجمس متسدح مسكين في ضل الموتر

قلت له بعد ثلاثين اربعين كيلوا بيجيك محطه وقف وغير

الاسبير وركب كفر أحسن لك لان اسبيرك لك عليه

....

مشكور ما قصرت وبيض الله وجهك قلت يا رجال ما سوينا شي ...

يقول خوينا رحت لموتري

ونزلت جركل مويه وقعدت اغسل وموترهم واقف ورأي رجعوا الحريم واسمع صياح الحريم مع رجالهم وانأ اغسل إلا يوم اقبل الرجال علي

وفي يده كيس .... يقول قلت في نفسي عز الله هذا الي بيخليني ادوس ببطنه ..

اقبل علي واسمع أنواع من الشكر والدعاوي قلت يا رجال والله ما سويت شي يسوا قال تفضل ....

قلت وشوووووو ...

قال شي ما يسوأ لكن تعبير عن شكرنا لك

قلت خذ كيسك وتوكل على الله

وانا زعلان .............

قال والله يا الحريم إلي تشوفهم أمي وأخواتي وزوجتي معهم

لتاهوشت معهم وأظنك سمعت الصيحة بيينا الي قبل اشوي

قلت لهم بتزعلون الرجال عليناااااااا

حلفوا ما يركبون الموتر ولا يحركون شبر لين توصلك هديتهم ...

يقول توني بارد عليه رمى الكيس في غماره موتري وانا جالس اغسل وروح ..صحت عليه ما رد علي ركبوا موترهم وانأ لميت عدتي وإغراضي

وركبت ومشيت مئة متر والكيس مرمي عند دعسات ارجول الراكب.. وانتم بكرامه ...

أطالع الكيس الا الكيس حركاااات له ربطه وشكله ماركه ههههههههه

فتحته الا .......... جهاز جوال جديد بقراطيسه بشريحته

قيمته في ذلك الوقت 3000 او اكثر ....

يقول والله لضاق صدري لكن ........ اعتبرته هديه

وبعته وشريت بقيمته كم رأس حلال ....خعخعخعخع ....

وسلامتكم ،،،،،،،،،،

وصلى الله على سيدنا محمد

via منتديات مكشات http://www.mekshat.com/vb/showthread.php?t=602783&goto=newpost